Nəfəs” İctimai Birliyi “Kitabxanasız məktəb qalmasın!” şüarı ilə Quba rayonunun Tülər kənd ümumi orta məktəbində başlatdığı kampaniyanı bu dəfə Kunxırt kənd ibtidai məktəbində davam etdirdi. Rayon mərkəzindən 36 km uzaqlıqda yerləşən modul tipli bu məktəbin kitabxana üçün nəzərdə tutulan otağında kitab şkafı kiçik, uşaqların dərsliklərdən əlavə oxuya biləcəyi materiallar isə az idi. Biz də buna qeydsiz qalmayaraq sözügedən otağa yeni, geniş kitab şkafı hazırladıq, içərisini isə uşaqların yaş aralığına uyğun şəkildə 150-dək müxtəlif adda bədii kitablarla zənginləşdirdik. Əlavə olaraq otaqda məktəbli balalarımızın marağını çəkəcək təsvirlərlə bəzədilmiş oxu guşəsi yaratdıq. Arzu edirik və inanırıq ki, uşaqlarımızın asudə vaxtlarında bu guşədə oxuduğu kitablar bəlkə də onların həyatlarına toxunacaq, xəyal dünyasına yeni qapılar açacaq. Biz isə başlatdığımız bu kampaniyanı il ərzində digər regionların ucqar dağ kəndlərində həyata keçirərək daha çox məktəbə, daha çox fidana nəfəs olmağa davam edəcəyik.
Xeyirxahlıq və mərhəməti tərənnüm edən müqəddəs Qurban bayramında sevgi ilə hazırladığımız bayram sovqatı ilə insanlara nəfəs olduq. Könüllü gənclərimizlə birlikdə Bakı və Sumqayıt şəhərində yaşayan 90-dan çox aztəminatı ailəyə, şəhid və qazi ailəsinə qurban paylarımızı çatdırdıq, bayramlaşdıq. İnsanların ehtiyaclarına dəstək olmaq, qayğılarını paylaşıb üzlərində təbəssüm yarada bilmək bizim üçün ən gözəl bayram sevincidir.
Bu gün dünyanın ən qədim və ən köklü idman növlərindən biri hesab edilən Beynəlxalq Şahmat Günüdür. İntellektual inkişafımızda əvəzsiz rol oynayan şahmat beynimizin hər iki yarımkürəsini eyni zamanda işlədən yeganə idman növüdür. Son zamanlar ölkəmizdə bu idmana olan marağın sürətlə artması isə çox sevindiricidir. “Nəfəs” İctimai Birliyi olaraq bu marağın daha da güclənməsinə dəstək olmaq məqsədilə 20 İyul Beynəlxalq Şahmat Gününə həsr olunmuş “Qızlar və qadınlar arasında şahmat turniri”nin həyata keçirilməsinə sponsor olduq. Qax Olimpiya İdman Kompleksində təşkil olunan turnirdə Oğuz, Qax, Şəki, Zaqatala və Balakən rayonlarından yarışmaya qatılan 170 qızımız mübarizə apardı və qaliblər müəyyənləşdi. Qaliblərə birliyimiz adından peşəkar şahmat dəsti və müxtəlif hədiyyələr təqdim edildi. Yarışmadan sonra isə beynəlxalq dərəcəli qrossmeysterlər Aynur Sofiyeva, Zeynəb Məmmədyarova və Türkan Məmmədyarovanın iştirakı ilə Qax rayon Heydər Əliyev Mərkəzində şahmatçılar üçün ustad dərsləri təşkil olunub. Müəllimlər və gənc şahmatçılar bəzi məşhur oyunları analiz edib və müzakirələr aparıblar. Gənclərimiz, xüsusilə də qızlarımız üçün olduca faydalı və məhsuldar keçən belə yarışmaların sıxlıqla təkrarlanması, ölkəmizdə şahmata olan marağın güclənməsi üçün dəstək olmağa hər zaman hazırıq. Bütün şahmatçılarımızı Beynəlxalq Şahmat Günü münasibətilə ürəkdən təbrik edir, onlara karyera yolunda müvəffəqiyyət arzulayırıq. Qələbəniz bol olsun!
15 Fevral Ümumdünya Uşaq Xərçəngi ilə Mübarizə Günüdür. Bu gün münasibətilə Nəfəs İctimai Birliyinin üzvləri Uşaq Onkologiya Mərkəzini ziyarət ediblər. Bu haqda Nəfəs İctimai Birliyinin sədri Firəngiz Balakişiyeva məlumat verib.
O qeyd edib ki, bu günü özəl edən məqam kiçik ürəkləri ilə böyük mübarizələrə yelkən açan, yaşlarının az olmasına baxmayaraq həyata tutunmağa çalışan kiçik qəhrəmanlarımızdır: “Sözün əsl mənasında bir qəhrəman kimi həyatla savaşan bu balacalara olan sevgimizi hiss etdirmək, onların mübarizəsinə dəstək olmaq məqsədilə Milli Onkologiya Mərkəzinin Uşaq kimyaterapiya şöbəsində müalicə alan uşaqlar üçün müxtəlif hədiyyə qutuları hazırladıq. Uzun müddətdir davam edən pandemiyanı nəzərə alaraq, qəhrəmanlarımızla üzbəüz görüşüb onlarla zaman keçirmək, söhbət etmək mümkün olmasa da, öz dəstəyimizi bu şəkildə bildirdik.
Böyük sevgi ilə hazırladığımız qutulara komandamızın qəlbindən keçən sözlərini, duyğularını qələmə aldığı kiçik mesaj kartlarını da əlavə edib Uşaq kimyaterapiya şöbənin əməkdaşlarına təhvil verdik.
Bu gün istər ölkəmizdə, istərsə də dünyada bu xəstəlikdən əziyyət çəkən minlərlə uşaq, onlarla birikdə mübarizə aparan minlərlə valideyn var. Bütün balalarımıza Allahdan şəfa diləyir, kiçik dostlarımıza həyatla hər zaman mübarizə apara bilmək üçün güc-qüvvət, sağlamlıq arzu edirik. Onlara demək istəyirik ki, siz güclüsünüz və bu mübarizədə qalib tərəf siz olacaqsınız”.
Eyni maraqlar uğrunda birləşmiş könüllülərin təşəbbüsü ilə yaradılan, ictimai əsaslarla fəaliyyət göstərən, gəlir əldə etməyi nəzərdə tutmayan, fəaliyyət istiqamətini yardımlaşma və dayanışma prinsipləri əsasında həyata keçirən bu insanlıq hərəkatı çıxdıqları yolda yüzlərlə insana və ailələrə maddi-mənəvi dəstək olub, onların arzularını reallışdırmağa çalışıb.
Qarabaginfo.az xəbər verir ki, “Nəfəs” ictimai birliyi dekabr ayına olan hesabatını təqdim edib.
3 dekabr Beynəlxalq Əlillər Günü münasibətilə Milli Xalça Muzeyində təşkil olunan “sərhədsiz sənətkarlıq” adlı xeyriyyə sərgi yarmarkası təşkil olunub.
“Nəfəs” ictimai birliyinin dəstəyi ilə həyata keçirilən sərgidə fiziki məhdudiyyətli olan bir qrup istedadlı insanların əsərləri və əl işləri nümayiş olunub.
Noyabr ayında isə “Nəfəs” ictimai birliyi tərəfindən Nərimanov rayonunda yaşayan gözdən əlillər yataqxanasında bir çox ailələr ziyarət edilib.
Azərbaycan Dövlət Pedoqoji universitetinin tarix-coğrafiya fakültəsinin sonuncu kurs tələbəsi olan Kamalın kəsr borclarını və son kurs üçün nəzərdə tutulan illik təhsil haqqı qarşılanıb.
Dekabr ayında həmçinin autizmdən əziyyət çəkən Abbaszadə Nihanın müalicəsi birliyin öhdəliyindədir .5 yaşlı Nihan anadangəlmə bu sindromla doğulub və valideynləri onu 2 yaşından etibarən müalicə etdirdiklərini deyirlər.
Sosial çətinliklərə görə yarım qalmış müalicə hal-hazırda “Qüsursuz nitq korreksiya” mərkəzində davam etdirilir.
Noyabr ayında şəhid Budaqov Yusifin anası Lətafət xanımın kirayə yaşadığı evi ziyarət edib problemləri birlik tərəfindən dinlənilib .Həm həyat yoldaşını həm də yeganə övladını vətənə qurban verən Lətafət xanıma yardımsevər vətəndaş tərəfindən bağışlanmış mənzilin mebel və əşyalarla təminatını da birlik təmin edib.
Həmçinin dekabr ayında Vüsalə Paşayevanın dünyaya yenicə göz açan övladının ciddi qayğıları üçün xəstəxanaya olan ödənişi də qarşılanıb.
Böyrək və ağciyərində olan problemlərlə bağlı Türkiyədə müalicə alması üçün Əliyeva Vüsaləyə maddi dəstək göstərilib.
Həyat yoldaşını itirmiş aztəminatlı Məhluqə Xələfovanın gündəlik həyat şəraitinin yaxşılaşdırılması üçün bir müddət əvvəl dərzilik kursu başladılıb .
Şəhid Hüseynli İbrahimin oğlu Əlituranı isə artıq bir ildir ki, Nəfəs ictimai birliyi himayəsinə götürüb .
Əslən Qusar rayonundan olan şəhidimiz Zamanov Sənanın Bakıda özəl məktəblərdən birinə qəbul olan övladının təhsili və kirayə mənzilin ödənişi də həyata keçirilib.
Xatırladaq ki, “Nəfəs” İctimai Birliyinin sədri Firəngiz Balakişiyevadır.
http://qarabaginfo.az/karusel/30677-nfs-ictimai-birliyi-aylq-faliyyt-hesabatn-tqdim-edib-foto.html