Qalib xalq olaraq bu bayramı bizə zəfər bəxş edib başımızı uca tutan, xarıbülbülü azadlığa qovuşduran şəhid və qazilərimizə borcluyuq. “Nəfəs” İctimai Birliyi olaraq biz də torpaqlarımızın azadlığı uğrunda canlarını qurban edən şəhid ailələrinə baş çəkərək daim onların yanında olduğumuzu hiss etdirmək və bayramımızı bu şəkildə qeyd etmək istədik. Bunun üçün Quba rayonunda yaşayan şəhid ailələri ilə görüş təşkil etdik. Quba rayonu Şəhidlər Xiyabanı ziyarəti ilə başlayan səfərimiz rayonun müxtəlif kəndlərində yaşayan ailələrə baş çəkməklə davam etdi. Şəhidlərimizin bizə əmanəti olan ailələrinə mənəvi dəstək olduq, onlar üçün hazırladığımız məktubla birlikdə novruz sovqatını və kiçik maddi hədiyyələrimizi təqdim etdik. Bunula yanaşı, Bakı, Bərdə və Şəki şəhərində olan könüllülərimiz vasitəsilə ümumilikdə 20-dən çox şəhid ailəsini ziyarət etdik, onlara bayram sovqatını çatdırdıq.

Vətənimizin bütövlüyü uğrunda əziz canlarından keçərək bizə zəfər bəxş edən şəhidlərimizin dəyərli ailələrini və qazilərimizi daim yad etmək, hər fürsətdə onlara öz minnətdarlığımızı bildirmək bizim üçün şərəfdir.

8 mart Beynəlxalq əməkçi qadınlar gününü kollektivimizlə birlikdə zəhmətkeş xanımlarımızla görüşərək keçirdik. Bayram günü olmasına baxmayaraq iş başında olan əməkçi xanımlarımızı ziyarət etdik, kişi əməkdaşlarımız tərəfindən onlar üçün yazılan təbrik mesajlı 30 ədəd kartla birlikdə kiçik maddi hədiyyələrimizi təqdim etdik.

Onların simalarında yaranan məsum təbəssüm bizi sevindirməyə kifayət etdi. Hər zaman üzünüzün gülməsi diləyi ilə

Uğur balamız anadangəlmə autizm spektr pozuntusundan əziyyət çəkir. Onun kiçik ürəyinə bir nəfəs olmaq üçün başlatdığımız psixoloq və müalicəvi idman prosedurları növbəli şəkildə davam edir. Anlama, qavrama və tanıma seanslarından sonra Uğurun nitq inkişafı üçün müalicə prosesini loqoped kursu ilə davam etdirəcəyik.

Bu gün uzun müddətdir qayğıları ilə yaxından maraqlandığımız Vətən müharibəsi iştirakçısı olan qazimiz Allahverən Nuralıyevlə Aytac Eynalzadənin Sumqayıt “ASAN xidmət” mərkəzində nikahı qeydə alındı. Biz də “Nəfəs” İctimai Birliyi olaraq onların bu gözəl gündə iştirak etdik.

Müharibənin bizə qazandırdığı Allahverən kimi mərd və onun ağrı-acılarını unutduracaq Aytac kimi təmiz qəlbli insanları tanıdığımız üçün çox şadıq. Bu xoş tanışlığın hələ uzun müddət davam edəcəyinə inanır, cütlüyümüzə yeni həyat yolunda sonsuz xoşbəxtlik, sevgi və səadət dolu ömür arzu edirik.