Serebral iflicindən əziyyət çəkən Şəms “Nəfəs” ictimai birliyinin qonağı oldu. “Yeni Gündəm” xəbər verir ki, sədr Firəngiz Balakişiyeva açıqlamasında qeyd etdi ki, həyat dolu təbəssümü ilə hər birimizin qəlbini isidən bu kiçik qızımızın 6 yaşı var. “Nəfəs” İctimai Birliyi olaraq Şəmsin əlindən tutub 1 il boyunca bütün müalicə məsrəflərini öhdəliyimizə götürdük. “Qüsursuz Nitq” Korreksiya Mərkəzində Şəmsin loqopedik masaj, psixopedaqoq və fizioterapiya seanslarına artıq başlamışıq. Həkimlərimiz də, biz də ümid edirik ki, təyin olunan müalicə prosesi davam etdikcə Şəmsin vəziyyətində müsbət dəyişiklikləri müşahidə etməyə başlayacağıq.
Sizi yenicə 1 yaşına qədəm basmış Alituranla tanış etmək istəyirik. Atası – qəhrəman şəhidimiz Hüseynli İbrahimin son arzusuna əsasən Alituran adlandırılıb. “Yeni Gündəm” xəbər verir ki, “Nəfəs” İctimai Birliyinin sədri Firəngiz Balakişiyeva açıqlamasında qeyd etdi ki, kiçik qəlbi ilə həyata tutunmağa çalışan Alituranı artıq 1 ildir ki, “Nəfəs” İctimai Birliyi olaraq himayəmizə almışıq və maddi-mənəvi bütün ehtiyaclarını öhdəliyimizə götürmüşük.Onun ilk yaşını qeyd etmək, doğum günündə iştirak etmək isə bizim üçün olduqca qürurvericidir. Gözəl balamıza Allahdan uzun, sağlam və xoşbəxt ömür arzu edirik. Bizim firəvan gələcəyimiz üçün öz həyatlarını qurban verən şəhidlərimizin ailələri və övladları ən dəyərli sərvətimizdir. Onları qorumaq, qayğısına qalmaq, daim diqqət mərkəzində saxlamaq isə mənəvi borcumuzdur.
MM Mədəniyyət komitəsinin sədri Q. Paşayeva və “Nəfəs” İB-nin sədri F. Balakişiyeva şəhid Nurlan Quliyevin anası Zülfiyyə Quliyeva ilə görüşüblər. Millət vəkili düşmən üzərində tarixi qələbəmizlə sonuclanmış Vətən Müharibəsinin birinci ildönümünü, Zəfər Bayramımızı xalqımızın, dünya azərbaycanlılarının, Azərbaycan dostlarının və dünyadakı bütün məlumatlı tərəqqipərvər insanların fərəh və qürurla qeyd etdiyini deyib, ürək sözlərini bölüşüb: “Bu fərəh, qürur ilk növbədə siz şəhid analarının haqqıdır. Biz sizə çox minnətdarıq. Şəhid oğlunuzun ruhu qarşısında dərin ehtiramla baş əyirik. Vətəncanlı oğlunuz ərazi bütövlüyümüzün bərpa edilməsi, torpaqlarımızın yağı düşməndən azad edilməsi uğrunda gedən döyüş əməliyyatlarında iştirak edib, şəhadlik mərtəbəsinə yüksəlib. Şəhidlərimizin qanı yerdə qalmayıb, yağı düşməndən ağır qisas alınıb. Bu gün işğaldan azad olunmuş ərazilərimizdə dalağalanan müqəddəs bayrağımız şəhid ruhlarını şad edir! Əziz şəhid anası, Sizi yeni təqvim ilinin başlaması münasibəti ilə təbrik edir, ən xoş diləklərimi yetirirəm”! Şəhid anası oğlunun həyat və döyüş yolundan danışıb. Komitə sədri şəhid anasına Qarabağ motivli xatirə hədiyyəsi təqdim edib. Qeyd edək ki, Azərbaycan Silahlı Qüvvələrinin əsgəri, Vətən müharibəsinin şəhidi Nurlan Şükür oğlu Quliyev (04.12.1995, Qaraxanlı, Ağcabədi – 01.11.2020, Şuşa rayonu) 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması məqsədi ilə başlanan Vətən Müharibəsi zamanı Şuşa istiqamətində gedən döyüşlərdə şəhid olub, Ağcabədi rayonunda dəfn edilib. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirən Nurlan Quliyev Azərbaycan Prezidenti İlham Əliyevin 15.12.2020-ci il tarixli Sərəncamına əsasən “Vətən uğrunda” medalı ilə təltif edilib. O, həmçinin, “Füzulinin azad olunmasına görə” və “Cəsur döyüşçü” medalları ilə təltif edilib. Ruhu şad olsun!
Bir il ərzində yaranmış “Nəfəs” İnsanlığa Dəstək İctimai Birliyi 2021-ci il böyük nailiyyətlər ilə geridə qoyur.
“Yeni Gündəm” xəbər verir ki, eyni maraqlar uğrunda birləşmiş könüllülərin təşəbbüsü ilə yaradılan, ictimai əsaslarla fəaliyyət göstərən, gəlir əldə etməyi nəzərdə tutmayan, fəaliyyət istiqamətini yardımlaşma və dayanışma prinsipləri əsasında həyata keçirən bu insanlıq hərəkatı bu il çıxdıqları yolda yüzlərlə insana və ailələrə maddi-mənəvi dəstək olub, onların arzularını reallışdırmağa çalışıb.
Birliyin bir illik hesabatında bildirilir:
“Məqsədimiz ölkəmizin sosial, ictimai və mədəni həyatında əhəmiyyətli işlər görərək öz dəstəyimizi göstərməkdir. Platformamız sosial problemlərin həlli istiqamətində xüsusi qayğıya ehtiyacı olan insanların həyatlarına toxunur, onlara nəfəs olmaq üçün yardımsevər insanları bir araya toplayır. Biz həmçinin, qloballaşan dünyamızda milli-mənəvi dəyərlərimizi qoruyub saxlamaq və mədəniyyətimizi geniş şəkildə təbliğ etmək istəyirik.
Çox böyük ümidlərlə və qəlbimizin ən səmimi duyğuları ilə çıxdığımız bu yolda əsas məqsədimiz insanlara, heyvanlara, təbiətə, bir sözlə xüsusi qayğısı olan bütün canlı aləmə nəfəs olmaq əlimizdən gələn maddi-mənəvi bütün dəstəyi göstərmək idi. Fəaliyyət istiqamətimiz müxtəlif olsa da əsas gücümüz şəhid və qazi ailələrinə ayırdıq. Çünki ölkəmiz çox çətin və çox həssas bir dönəmdən keçdi. Doğrudur, şükürlər olsun ki, Vətən müharibəsindən, haqq savaşından qalib ayrıldıq, Qarabağımızı yenidən geri qazandıq. Lakin bu əvəzolunmaz hisləri bizə yaşadan şəhid və qazilərimizdən aldığımız xəbərlər bizi olduqca narahat edirdi. Düşündük, dedik ki, madam ki, həyatdayıq, gücümüz yetir, bir şeylər etməliyik. Bu minvalla qollarımızı çirmələyib, işə başladıq”.
Qeyd olunub ki, birlik bir il ərzində 189 şəhid və qazi ailəsində evini ziyarət edib, onların həyat hekayələrini dinləyib: “Çalışdıq ki, yalnız mərkəzdə, Bakıda yaşayan qazi və şəhid ailələrini deyil, bölgələrdə yaşayanları da diqqətdən kənarda qoymayaq. Mövcud imkanlarımız daxilində müxtəlif bölgələri ziyarət etdik, sağlamlığını itirmiş 45 qazinin müayinə və müalicə xərclərini qarşıladıq onlardan 8-nin cərrahiyyə əməliyyatını həyata keçirdik. 53 şəhid və qazi ailəsinin sosial həyatına birdəfəlik maddi dəstək göstərdik. 4 ailənin mənzil şəraitinin yaxşılaşdırılmasına kömək etdik, evlərini bütün növ mebel və əşyalarla təmin etdik. Bir şəhidimizin dünyaya yenicə göz açan övladını bir il boyunca himayəyə götürdük və bütün ehtiyaclarını qarşıladıq. Bir şəhid bacısını həkim tövsiyəsi əsasında əməliyyat etdirdik”.
“Nəfəs” İctimai Birliyi əsas gücünü bu istiqamətə ayırsa da digər sahələri də unutmayıb:
“İstər sosial, istərsə də mədəni, istərsə də ekoloji, gücümüz nəyə çatdısa ona yetməyə çalışdıq. Bu il ərzində “Bir ağac bir nəfər” devizi altında iki böyük ağacəkmə aksiyası həyata keçirdik. Ümumilikdə 700 fidana nəfəs verdik, onları torpağa qovuşdurduq. Təhsil də bizim üçün ən önəmli sahələrdən biridir. Gələcəyə nəfəs olaq deyərək, bu istiqamətdə fəaliyyətimizi gücləndirdik. İl ərzində sosial təminatı aşağı olan 16 tələbənin təhsil xərclərini qarşıladıq və böyük qürur hissi ilə qeyd etmək istərdik ki, onlardan 11-i qəhrəman şəhidlərimizin övladıdır və ali təhsillərini Türkiyədə davam etdirirlər.
Bununla yanaşı “Bir çanta bir sevinc” adlı kampaniyasını da həyata keçirdik və Bakı, Sumqayıt da daxil olmaqla bölgələrdə yaşayan qazilərimizin ümumilikdə 85 məktəbli övladına dərs ləvazimatlarından ibarət məktəbli çantası təqdim etdik, onlara yeni təhsil ilində uğurlar arzuladıq.
İl boyunca məktəblilərin asudə vaxtlarının səmərəli keçməsi üçün “Bonus” Gənclər Birliyi ilə birgə layihə həyata keçirdik. Yeniyetmələrdə oxu vərdişini yaratmaq, onlarda dünya görüşünü inkişaf etdirmək və xarici dilə ədəbiyyata olan maraqlarını artırmaq üçün mütaliə və danışıq klubları təşkil etdik və uğurla yekunlaşdırdıq. Ümumilikdə 110 ailənin sosial qayğılarına maddi və mənəvi dəstək olduq. Ailə başçısını itirmiş 2 xanımın sənət öyrənməsi üçün kursa yazdırdıq, bölgələrdə yaşayan iki ailənin isə yarımçıq qalmış mənzil tikintisini tamamladıq.
Fiziki məhduddiyyətli dostlarımızı da unutmadıq.
Anadangəlmə autism xəstəliyindən əziyyət çəkən bir uşağın ürəyinə nəfəs olmaq üçün idman, psixoloq və digər prosedurlarını həyata keçirdik və olduqca müsbət nəticələr əldə etdik. Eyni diaqnozlu bir uşağın da bu ay eyni prosedurlarına başlamışıq. Bununla yanaşı Nərimanov rayonunda yerləşən gözdən əlillər üçün nəzərdə tutulan yataqxanada olduqca çətin şəraitdə yaşayan 15 gözdən əlil ailəsini ziyarət etdik onların sıxıntılarına ortaq olduq. Sonra da tanış olduğumuz Azərbaycan Pedaqoji Universitetinin tarix və coğrafiya fakültəsinin 4-cü kurs tələbəsi, Kamal adlı bir gəncin kəsir borclarını qarşıladıq. Dünyanı gözləri yox, könülləri ilə yaşayan bu insanları daim diqqət mərkəzində saxlamaq onların həyatların kiçik də olsa toxuna bilmək bizi xoşbəxt etdi. Ötən aylarda xalça muzeyində təşkilinə dəstək olduğumuz “Sərhədsiz sənətkarlıq” adlı xeyriyyə sərgi satış yarmarkasını da uğurla yekunlaşdırdıq. Sərgidə fiziki məhdudiyyətli bir qrup istedadlı dostumuzun rəsm əsərəri və əl işləri nümayiş olundu.
“Nəfəs” İctimai Birliyi olaraq bir müddət ehtiyacları ilə yaxından maraqlandığımız gənc rəssam Ceyhunun da bu sərgidə iştirakı və əsərlərinə olan böyük maraq bizə ayrıca qürurlandırdı. Sevindirici haldır ki, 3 gün davam edən sərgidəki rəsm əsərlərinin demək olar ki, böyük əksəriyyəti aksiyanın elə ilk günündəcə satıldı. Bu isə özlüyündə bir daha onu göstərdi ki, ölkəmizdə bu növ sərgilərə laqeyd yanaşılmır. Bu il həmçinin birliyimizin maddi dəstəyi ilə iki kitab da nəşr olundu. Millli Məclisin mədəniyyət komitəsinin sədri Qənirə Paşayevanın təşəbbüsü ilə yazıçı Güləmail Muradın “Tovuz döyüşləri”, Rauf Bəhmənlinin “Unudulmuş Azərbaycan marşları” kitablarının təqdimat mərasimi elə birliyimizin ofisində baş tutdu. İl bizim üçün çox gözəl yekunlaşdı, Belə ki, Nəfəs İctimai Birliyi bir neçə QHT tərəfindən müxtəlif tərifnamələr və təşəkkürnamələr ilə təltif olundu. Yola çıxdığımız ilk ildə həyata keçirdiyimiz işlərin, nəfəsi olduğumuz insanların hər ötən ayda sayca çoxalması bizim ən böyük motivasiya mənbəyimizdir”.
Xatırladaq ki, “Nəfəs” İctimai Birliyinin sədri Firəngiz Balakişiyevadır.
“NƏFƏS” İB-nin qərargahında keçirilən tədbirin aparıcısı – Milli Məclisin Mədəniyyət Komitəsinin eksperti Əkbər Qoşalı Zəfər Bayramı günlərində təqdimatı keçirilən “Tovuz döyüşləri” kitabının, Azərbaycan- Ermənistan dövlət sərhəddinin Tovuzdan keçən hissəsində 12-16 iyul 2020-ci ildə baş verən qanlı döyüşlərdən, orada şəhid olan qəhrəman hərbçilərimizin həyat və döyüş yolundan bəhs etdiyini bildirib.
Şəhidlərin ruhu bir dəqiqəlik sükutla yad edildikdən sonra kitab və kitabın mövzusu üzrə çıxışlar başlayıb. Kitabın müəllifi Güləmail Murad, kitabın önsöz müəllifi – “NƏFƏS” İB sədri Firəngiz Balakişiyeva nəşrin məğzi, şəhidlərimizin ömür yolu haqqında ürək sözlərini bölüşüb.
Milli Məclisin Mədəniyyət Komitəsinin sədri Qənirə Paşayeva Zəfər Günü ərəfəsində Mədəniyyət Komitəsinin xətti ilə keçirilən silsilə tədbirlərdən danışıb, general Polad Həşimov, polkovnik İlqar Mirzəyev və onların silahdaşlarına həsr olunmuş kitab barədə fikirlərini bölüşüb:
“Biz hamımız tarixi Zəfər Günümuzün müəlliflərinə, onların əziz ailələrinə dərin ehtiramımızı bildirir, canını Vətən uğrunda qurban vermiş qəhrəmanlarımızın ruhu qarşında dərin ehtiramla baş əyirik. Müzəffər Silahlı Qüvvələrimiz Ali Baş Komandanımızın kamil rəhbərliyi ilə tarixi ədaləti bərpa edib. Belə bir əziz bayram günü ərəfəsində şəhidlərimiz – Milli Qəhrəman İlqar Mirzəyev, “Vətənə xidmətə görə” ordenli mayorumuz Anar Novruzov kimi peşəkar hərbçilərimizin ailə üzvlərinin iştirakı ilə onların döyüş yolundan, vətəncanlılığından söz açan kitabı təqdim etmək vəfa borcumuzun bir ifadəsidir.
Burada millət vəkillərimiz, şəhid ailələri, yaralı qazilərimizlə sıx təmasda olan QHT rəhbərləri, gənclərimiz istirak edir. Pandemiya məhdudiyyətlərinə görə daha çox iştirakçı və bir ayri məkanda toplaşmasaq da, dəqiq bilirik ki, kimi bu tədbirə cağırsaq, dəvətimizi qəbul edərdi. Tovuz döyüşləri tarixi ədalətin bərpasına imkan verən 44 günlük müharibədəki qələbəmizə gedən yolun əsasyaradıcı hissəsi oldu. Necə deyərlər, 4 gündən 44 günə yol – uğurlu yol göründü. Güləmail xanım bu kitabın üzərində çox zəhmət çəkib, hər bir şəhidin evini ziyarət edib, onların şəxsi əşyaları, əlyazmaları ilə tanış olub; o, şəhid ailələrinin hiss-həyəcanına, müharibənin ağrı-acılarına yaxından bələddir və o, bu kitabı da ürəyini dinləyərək yazıb. Əlbəttə, bu gün ən böyük təsəllimiz torpaqlarımızın işğaldan azad olunması, o torpaqlarda böyük infrastruktur layihələrinin icrası, quruculuq, abadlıq işlərinin aparılmasıdır. Şuşada dalğalanan üçrəngli müqəddəs bayrağımız, 8 noyabr Zəfərimiz bugünləri görməyən oğullarımızın ruhunu şad edən böyük səbəblərdir. Mən Tovuz döyüşləri başlarkən rayona yola düşdüm, atəşkəs bərpa olununcayadək orda oldum. Mənim Polad Həşimovu da, İlqar Mirzəyevi, Anar Novruzovu da, o biri hərbçilərimizi də yaxından tanımaq fürsətim oldu. Onlar düşməni Tovuzda durdurub, düsmənə zərbə vurdu və xalqımızın möhkəm birliyinin simvoluna çevrildi. Heç zaman unutmayacağıq. Bu kitab da sevgi, sayğının ifadəsidir”.
Millət vəkilləri – akademik Nizami Cəfərov, Məşhur Məmmədov Tovuz döyüşlərindən çıxan nəticələr, təqdim olunan kitabın məziyyətləri barədə danışıblar. Millət vəkilləri Tovuz döyüşlərində şəhid olan peşəkar hərbçilərin öz talelərini şüurlu şəkildə müəyyənləşdirdiklərini vurğulayıblar: onlar öz həyatlarını şüurlu surətdə hərb sənətinə bağlamışdı; onlar və onlar kimi oğullar Vətən uğrunda, tarixi ədalətin bərpası uğrunda hər şeyi gözə almışdı və bu yolda ölüm, daha doğrusu, ölümsüzlük olduğunu bilirdi. Bu mövzuda nə qədər prinsipial olduqlarını müqəddəs şəhidlik mərtəbəsinə yüksəlməklə sübut etdilər. “Qazax xeyriyyə cəmiyyəti”nin sədri Prof.Dr. İlham Pirməmmədov, “Regional Hüquqi və İqtisadi Maarifləndirmə” İB sədri Arzu Bağırova, Azərbaycan Vətən Müharibəsi Veteranları Birliyinin sədr müavini Mübariz Hacıyev Tovuz doyüşlərində şəhid olan mərd Vətən övladlarının öz həyatları ilə bugünkü və gələcək nəsillərə örnək olduğunu bildirib, “Tovuz döyüşləri” kimi kitabların öyrədici özəlliklərini vurğulayıb. Natiqlər bu il birinci dəfə qeyd etdiyimiz 8 noyabr – Zəfər Bayramı Gününün tarixi önəmindən, bu günu bizə bəxş edən oğulların hünərindən, şəhidlər haqqında yazılan əsərlərin tərbiyəvi əhəmiyyətindən danışıblar.
Tədbirin təşkilatçısı Nəfəs İB-nin sədri F.Balakişiyeva təqdim olunan kitabın müəllifi G.Murada və şəhid ailələrinin üzvlərinə Qarabağ motivli xatirə hədiyyələri təqdim edib. M.Quliyevsə şəhid ailələrinə, yaralı qazilərimizə davamlı dəstəyi ilə seçilən “NƏFƏS” İB sədri Firəngiz Balakişiyevaya və RHİM İB sədri A.Bağırovaya Təşəkkür plaketi təqdim edib.
Sonda şəhid Milli Qəhrəman İlqar Mirzəyevin anasi Gülnar xanım, qardaşı Rəfael Mirzəyev, qəhrəmanın yaxin dostu – polkovnik Mürşüd Babayev, şəhid mayor Anar Novruzovun qardaşı Sucəddin Novruzov kitab və təqdimat mərasimindəki çıxışlar barədə öz ürək sözlərini bölüşüblər.
